Jukumu la Uchumi wa Kijani katika Kuongeza Uwekezaji

Imetafsiriwa na: Menna Ahmed Sallam
Imehaririwa na: Mervat Sakr
Mratibu wa Lugha ya Kiswahili: Mervat Sakr

“Uchumi wa Kijani ni Fursa za Kuongeza Uwekezaji katika Soko la Ndani”

Kutokana na mwelekeo wa Misri kuelekea kutekeleza miradi ya kijani kwa ajili ya maendeleo endelevu na maandalizi yake kwa mafanikio ya Mkutano wa COP27 uliofanyika mjini Sharm El-Sheikh mwezi Novemba uliopita, serikali imejikita katika miradi rafiki kwa mazingira. Miradi hii, pamoja na mipango kabambe ya Mfuko wa Mamlaka katika eneo la uchumi wa kijani, inaleta uwezekano wa kuzalisha miradi ya hidrojeni ya kijani kwa mara ya kwanza katika soko la ndani, huku ikikabiliana na changamoto na fursa mbalimbali katika sekta hii.

Dkt. Mohamed Maait, Waziri wa Fedha, alisisitiza kuwa kuna agizo la rais la kupanua uwekezaji katika miradi ya uchumi wa kijani. Lengo ni kuchangia katika kufikia maendeleo endelevu na jumuishi kwa kuzingatia mwelekeo wa mazingira, kupunguza uchafuzi wa mazingira, kuboresha ubora wa hewa kwa kupunguza uzalishaji wa kaboni, na kuongeza uwiano wa vipengele vya ndani katika tasnia ya kitaifa. Hii pia inalenga kuongeza viwango vya ukuaji, kuunda fursa mpya za ajira, na kuimarisha muundo wa uchumi mkuu, ili kuboresha kiwango cha maisha ya wananchi na huduma zinazotolewa kwao.

Serikali inalenga kuboresha ushindani wa Misri katika faharasa ya utendaji wa mazingira kwa kuongeza uwiano wa uwekezaji wa umma wa kijani kutoka 15% mwaka wa fedha wa sasa hadi 30% katika bajeti mpya, kwa kutekeleza miradi 140 ya maendeleo katika sekta mbalimbali. Hidrojeni imeorodheshwa miongoni mwa malengo ya mifuko ya mamlaka duniani, ikisisitiza umuhimu wa utekelezaji na siyo tu mapendekezo na maamuzi.

Ni muhimu kuweka miradi ya hali ya hewa na fursa za uwekezaji kwenye meza moja na wawekezaji, mashirika ya fedha ya kimataifa, benki za maendeleo, na vyombo vingine vinavyohusika, ili kubadilika kuelekea utekelezaji na kuhamasisha fedha zinazohitajika. Hii ni sehemu ya juhudi za Misri za kuimarisha ushirikiano wa kimataifa, kujenga mfumo wa mazingira barani Afrika unaoweza kukabiliana na mabadiliko ya hali ya hewa, na kusukuma mbele ajenda za maendeleo ya Afrika 2030 na 2063. Hatua hizi zinawakilisha kichocheo kikuu katika kuharakisha kupona kwa kijani.

Ni lazima pia kuangazia na kueneza uhamasishaji, kwani jukumu kuu ni kuvutia uwekezaji zaidi kwa manufaa ya uchumi wa kijani. Hii inahitaji mkakati maalumu wa uhamasishaji wa mazingira, ili kuhakikisha miradi inatekelezwa kwa ufanisi na kuleta matokeo chanya kwa wananchi na taifa kwa ujumla.