Bassem Al-Maghribi… Mtafiti wa Kimasri anayeota Nobel na Kupanda Njia yake Kuelekea Kilele cha Uongozi wa Kimataifa 

 
Imetafsiriwa na: Ahmed Hossam Hamed
Imehaririwa na: Mervat Sakr
Mratibu wa Lugha ya Kiswahili: Mervat Sakr 

Katika nyakati ambazo matumaini mengi yanayumbishwa na changamoto za kila siku, jina moja linajitokeza kama ishara ya msimamo, umahiri wa kitaaluma na uongozi wa kweli. Huyo ni Dkt. Bassem Khaled Abdelsalam Al-Maghribi, mtafiti kijana katika masuala ya kimataifa na sayansi ya siasa, anayejulikana kwa kuvunja vikwazo vya jadi na kutembea kwa hatua thabiti kuelekea ndoto aliyoitangaza wazi: kutwaa Tuzo ya Amani ya Nobel mwaka 2040.

Kutoka mitaa ya kihistoria ya Giza, ambako amezaliwa mnamo tarehe Septemba 19, 1990, safari yake ya mafanikio ilianza mapema. Akiwa bado mdogo, kipaji chake kilionekana wazi aliposhinda nafasi ya kwanza kitaifa katika Diploma ya Biashara. Baadaye alihitimu kutoka Chuo Kikuu cha Suez Canal, Kitivo cha Biashara, Idara ya Sayansi ya Siasa, akiwa mwanafunzi bora kwa miaka miwili mfululizo na pia Mwenyekiti wa Umoja wa Wanafunzi.

Ndoto zake hazikubaki ndani ya mipaka ya nchi. Alizipeleka mbali zaidi, hadi mabara mengine, na hatimaye kupata shahada ya Uzamili na Uzamivu kutoka vyuo vikuu maarufu vya China “Jilin” na “Beijing.” Ubora wa kazi yake uliwavutia wajumbe wa kitaaluma, na tasnifu zake ziliorodheshwa miongoni mwa bora zaidi. Kwa Kiingereza cha kitaaluma, aliandika kuhusu mzozo wa Kiarabu na Israeli, mapitio ya katiba, mahusiano kati ya China na Misri, pamoja na mijadala mipana ya kimataifa ya sasa.
        
Cha kushangaza zaidi katika wasifu wa Al-Maghribi ni wingi wa tuzo na heshima alizopokea, ambazo sasa zimefikia zaidi ya hamsini. Miongoni mwa zilizong’aa ni Tuzo ya Mwanafunzi Bora wa Kigeni, Tasnifu ya Uzamivu Bora, na Tuzo ya Mwanafunzi Bora wa Kimataifa nchini China kutoka Baraza la Udhamini wa Masomo la China (CSC). Aidha, amepokea pia tuzo za uongozi na utafiti kutoka taasisi mashuhuri za kitaaluma na kimataifa, ikiwemo Umoja wa Mataifa na Wizara ya Ulinzi ya Misri.
        
Katika uwanja wa taaluma, ameandika na kuchapisha tafiti nyingi zilizokubalika na wataalamu, ambazo zimeonekana kwenye majarida makubwa ya Kiarabu na kimataifa. Aidha, amehusishwa katika maandalizi ya zaidi ya mikutano na matukio 50 ya kitaaluma, ikiwemo kuhusu akili bandia, usalama wa taifa, mabadiliko ya tabianchi na migogoro ya kijiografia. Vilevile, ameshika nafasi muhimu za uratibu katika mifano ya mazoezi ya COP27, kundi la BRICS na pia kwenye shughuli za Umoja wa Mataifa.
      
Mbali na shughuli zake za kitaaluma, Al-Maghribi anajulikana pia kama kiongozi wa kiasili. Amebeba majukumu mbalimbali, ikiwemo kuwa Naibu Mkurugenzi wa Kituo cha Kuandaa Viongozi katika Chuo Kikuu cha Suez Canal, na kuratibu miradi kwa kushirikiana na mashirika ya kimataifa kama Ofisi ya Umoja wa Mataifa ya Kupambana na Dawa za Kulevya na Uhalifu (UNODC). Pia ni mwanachama wa Baraza la Vijana la Misri, Umoja wa Vijana wa Jamhuri Mpya, na Umoja wa Kiarabu wa Sayansi za Kibinadamu na Maendeleo.

Shughuli zake binafsi zimevuka kalamu na kuingia kwenye michezo, sanaa za mapigano na mchezo wa chess, ambapo ameshinda nafasi za kwanza katika mashindano ya baiskeli, mbio ndefu, pamoja na mashindano ya vyuo vikuu. Aidha, yeye ni mkufunzi aliyeidhinishwa wa Teknolojia ya Habari na mzungumzaji mwenye uzoefu katika mikutano mingi ya kisiasa na kitamaduni.

Wakati ambapo wengine wanaweza kudhani kwamba mafanikio aliyoyapata tayari yanatosha kwa maisha yote, yeye anaamini safari yake ya kweli ndiyo inaanza sasa, akilenga kwa dhati lengo kuu: kuchangia katika ujenzi wa Misri yenye nguvu na yenye ustawi, pamoja na jamii ya kimataifa iliyo na haki na mshikamano zaidi, na hatimaye kufanikisha ndoto ya kutunukiwa Tuzo ya Nobel ya Amani mwaka 2040.